অদিতি সেৱা: ভাষা সাহিত্য সংস্কৃতি চৰ্চা আৰু অনুশীলনৰ মুকলি মঞ্চ নগাঁৱৰ অৰুণোদয় সাহিত্য চ’ৰাৰ দ্বি -বাৰ্ষিক পূৰ্ণাংগ অধিৱেশন খনি যোৱা ২৮ জুলাই তাৰিখে দিনযোৰা কাৰ্যসূচীৰে নগাঁৱৰ ঐতিহ্যমণ্ডিত আনন্দৰাম ঢেকিয়াল ফুকন মহাবিদ্যালয়ত অনুষ্ঠিত হয় । অৰুণোদয় সাহিত্য চ’ৰাৰ সভাপতি সাহিত্যিক গুণধৰ নাথে পুৱা পতাকা উত্তোলনেৰে অধিৱেশনৰ কাৰ্যসূচী মুকলি কৰে।
দিনৰ এক বজাৰ পৰা আৰম্ভ হয় অধিৱেশনৰ মুকলি সভা । নগাঁও বিশ্ববিদ্যালয়ৰ হিন্দী বিভাগৰ মুৰব্বী অধ্যাপিকা ড° কৰবী দেৱীৰ এটি বৰগীতেৰে আৰম্ভ হোৱা এই মুকলি সভাতেই শংকৰী সাহিত্য সংস্কৃতিৰ বিশিষ্ট গৱেষক পণ্ডিত ড° নৰেন কলিতাক এইবাৰ ‘অৰুণোদয় সাহিত্য চ’ৰাই প্ৰদান কৰে ‘অৰুণোদয় সন্মান -২০২৪’ । বৰেণ্য সাহিত্যিক গৰাকীয়ে এই সন্মান গ্ৰহণ কৰি কয় অৰুণোদয় সাহিত্য চ’ৰাৰ লগত মোৰ সম্পৰ্ক পূৰ্বৰে পৰা আছে । আজি মোক দিয়া এই সন্মানে মোক ধন্য কৰিছে । আমাৰ ভাষা আৰু সংস্কৃতিৰ প্ৰতি বিগত এটা দশকত কিছু প্ৰত্যাহ্বান নহাকৈ থকা নাই । এই ক্ষেত্ৰত অৰুণোদয় সাহিত্য চ’ৰাই যঠেষ্ট ইতিবাচক কাম কৰিছে । বিশিষ্ট গৱেষক গৰাকীয়ে লগতে কয় নিজৰ ভাষা সংস্কৃতিৰ প্ৰতি শ্ৰদ্ধা জনোৱাটো প্ৰতিজন ব্যক্তিৰ এক নৈতিক কৰ্তব্য ।

ইয়াৰ পাছতেই বিগত বৰ্ষ সমূহৰ দৰে এইবাৰো প্ৰৱন্ধ, গল্প আৰু কবিতা শিতানত তিনিগৰাকী নগাঁৱৰ সাহিত্যিকক প্ৰদান কৰা হয় ‘কুঞ্জ মোহন বৰা সোৱৰণী অৰুণোদয় সাহিত্য বঁটা’ । এইবাৰ এই বঁটা আগবঢ়োৱা হৈছে প্ৰৱন্ধ শিতানত কাৰুণ্য ভট্টাচাৰ্য, গল্প শিতানত কল্পনা হাজৰিকা আৰু কবিতা শিতানত অনু কোৱৰ সিংহক । ‘অৰুণোদয় সাহিত্য চ’ৰা’ৰ অধিৱেশনৰ লগত সংগতি ৰাখি মুৰুলী বৰুৱাৰ সম্পাদনাত প্ৰস্তুত কৰা ১৬৮ পৃষ্ঠাৰ সাহিত্য সংকলন ‘অৰুণোদয়’ উন্মোচন কৰে নগাঁও বটদ্ৰবা সমষ্টিৰ বিধায়ক তথা সাংস্কৃতিক কৰ্মী ৰূপক শৰ্মাই । একেটা অনুষ্ঠানতে বুবু সেনচোৱাই সম্পাদনা কৰা মৃদুপৱন বৰাৰ নিৰ্বাচিত কবিতা সংকলন ‘ ডেউকা ভগা পখীৰ কলৰৱ’ গ্ৰন্থ খনি উন্মোচন কৰে নগাঁও জিলা সাহিত্য সভাৰ সভাপতি থগিত মহন্তই, জোনাকী বৰ্মন বৰা আৰু মৃদুপৱন বৰাই সম্পাদনা কৰা প্ৰয়াত কবি কুঞ্জ মোহন বৰাৰ কাব্য গ্ৰন্থ ‘বিন্দুতে মই’ উন্মোচন কৰে নগাঁৱৰ প্ৰাক্তন বিধায়ক দুৰ্ল্লভ চমুৱাই আৰু ৰিণি নেওগ বৰাৰ কাব্য গ্ৰন্থ ‘বিমুগ্ধ পোহৰৰ বাবে’ গ্ৰন্থ খন উন্মোচন কৰে ড° সদানন্দ পায়েঙে ।

মুকলি সভা খনিত নিদিষ্ট বক্তা ৰূপে উপস্থিত থাকি ‘অসমীয়া ভাষাৰ প্ৰসাৰ ,প্ৰচাৰ আৰু ভাষা ভিত্তিক জাতীয়তাবাদ’ শীৰ্ষক বক্তব্য প্ৰদান কৰে আনন্দৰাম ঢেকিয়াল ফুকন মহাবিদ্যালয় অধ্যক্ষ ড° সদানন্দ পায়েঙে । নিদিষ্ট বক্তাৰ ভাষণত ড° পায়েঙে কয় ভাষাৰ পৰিচয় ভৌগলিক ভাৱে, সাংস্কৃতিক ভাৱে, ঐতিহাসিক ভাৱে হ’ব লাগে । কাৰণ অসমখন বিভিন্ন জাতি জনগোষ্ঠীৰ অসংখ্য ভাষাৰে সমৃদ্ধিশালী । বিষয়টো কিছু জতিল যদিও সাংস্কৃতিক আৰু ভৌগলিক ভাৱে আমাৰ মনবোৰ প্ৰায় একেই । সেয়ে আমি ভাষাভিত্তিক জাতীয়তাবাদৰ কথা কোৱতকৈ সাংস্কৃতিক বা ভৌগোলিক জাতীয়তাবাদৰ কথা কলে বেছি প্ৰাসংগিক হ’ব । শিল্পী গায়ত্ৰী দেৱীৰ নেতৃত্বত এটি সমবেত সংগীত আৰু জাহিদা বেগমৰ নেতৃত্বত এটি সুন্দৰ জিকিৰে সামগ্ৰীক অনুষ্ঠানটি জীপাল কৰি তোলে । একেটা অনুষ্ঠানতে অৰুণোদয় সাহিত্য চ’ৰাৰ নৱ নিৰ্বাচিত সভাপতি সাহিত্যিক কাৰোণ্য ভট্টাচাৰ্য আৰু সম্পাদক অনু কোৱৰ সিংহক দায়িত্বভাৰ অৰ্পন কৰা হয় । সামগ্ৰিক অনুষ্ঠানটি আত ধৰে সম্পাদক আবুল হুছেইনে ।