জুৰীয়া প্ৰেছ গীল্ডৰ প্ৰতিষ্ঠা দিৱস উপলক্ষে সাত গৰাকী জ্যেষ্ঠ সাংবাদিকক সম্বৰ্ধনা
“সত্যৰ ওপৰত প্ৰতিষ্ঠিত বাতৰি পৰিৱেশন কৰি সংবাদ মাধ্যমৰ বিশ্বাসযোগ্যতাক ধৰি ৰাখিব লাগিব”- জীতেন বৰকটকী
ষ্টাফ ৰিপৰ্টাৰ,নগাঁও : হিন্দু -মুছলমানৰ সম্প্ৰিতিৰ মিলনভূমি হিছাপে চিহ্নিত বৃহত্তৰ জুৰীয়া অঞ্চলৰ দীৰ্ঘদিনীয়া ভাতৃত্ববোধ আৰু সমন্বয় অক্ষুন্ন ৰক্ষাৰ স্বাৰ্থত আজি আনুষ্ঠানিক ভাবে আত্মপ্ৰকাশ ঘটে জুৰীয়া প্ৰেছ গীল্ড নামৰ এক সাংবাদিক সংগঠন। তদুপলক্ষে আজি জুৰীয়া ছিনিয়ৰ চেকেণ্ডৰী স্কুলত বিশিষ্ট শিক্ষাবিদ, সাংবাদিক ফজলুল হক মৰলক সভাপতি, আবু আনচাৰীক কাৰ্যকৰী সভাপতি আৰু শীবেন্দু বৰাক সাধাৰণ সম্পাদক হিচাপে লৈ জুৰীয়া প্ৰেছ ক্লাব গ্লীডৰ ৩১ জনীয়া সদস্যৰে পূৰ্ণাংগ সমিতি গঠন কৰা হয়। উত্ত সভাত নগাঁও জিলাৰ উত্তৰ পশ্চিমঞ্চলৰ ইলেকট্ৰনিক মিডিয়া, প্ৰিণ্ট মিডিয়া আৰু ৱেব প্ৰৰ্টেলৰ প্ৰায় ৫০ ৰো অধিক সংবাদ সেৱীয়ে অংশগ্ৰহণ কৰে। সাংবাদিক সংগঠনটোত উপ-সভাপতি ক্ৰমে বাবুল শইকীয়া, দিবাকৰ বৰা, ৰাণা আহমেদ, সহকাৰী সম্পাদক আজমল হুছেইন, গিয়াছ উদ্দিন আহমেদক দায়িত্ব দিয়া হয়। ইপিনে, প্ৰেছ গীল্ডৰ প্ৰতিষ্ঠা দিৱসৰ লগত সংগতি ৰাখি সংগঠনটোৰ নৱ নিৰ্বাচিত সভাপতি ফজলুল হক মৰলৰ সভাপতিত্বত অনুষ্ঠিত সভাত ছয় গৰাকীকৈ বিশিষ্ট সাংবাদিকক সম্বৰ্ধনা জনোৱা হয়। সেই অনুসৰি নগাঁও প্ৰেছ ক্লাৱৰ নৱ নিৰ্বাচিত সভাপতি সম্পাদক ক্ৰমে জীতেন বৰকটকী আৰু সম্পাদক নিলোৎপল বৰালৈ বিশেষ সম্বৰ্ধনা আগবঢ়োৱা হয়।
লগতে জুৰীয়াৰ পৰা গৈ ৰাজ্যৰ সংবাদ জগতত গুৰুত্বপূৰ্ণ দায়িত্ব লাভ কৰি প্ৰতিষ্ঠিত হোৱা সাংবাদিক ক্ৰমে বাহাৰুল ইছলাম, নাজিম উদ্দিন আহমেদ, ৰকিবুল ওৱাহিদ, ফজলুল হক মৰল, মহিব উল্লাহক গামোচা, জাপি আৰু সমদ্ধনা পত্ৰৰে শুভেচ্ছা জনোৱা হয়। উক্ত অনুষ্ঠানত বিশিষ্ট অতিথি হিচাপে অংশগ্ৰহণ কৰা নগাঁও প্ৰেছ ক্লাৱৰ নৱ নিৰ্বাচিত সভাপতি জীতেন বৰকটকীয়ে কয়, ‘জুৰীয়া এখন ইতিহাস প্ৰসিদ্ধ ঠাই। এই অঞ্চলটি শিক্ষা-সংস্কৃতি, সাহিত্য, অৰ্থনীতি আদি সকলো দিশতে আগবঢ়া। অকল ইমানেই নহয়, হিন্দু-মুছলমানৰ মিলনভুমি হিচাপে পৰিচিত এই অঞ্চলটোৰ সাংবাদিক সকলক লৈ গঠিত জুৰীয়া প্ৰেছ গীল্ডৰ নেতৃবৃন্দই এক ইতিবাচক দৃষ্টি ভংগীৰে আগবাঢ়ি যাব লাগিব। সত্যৰ উপৰত প্ৰতিষ্ঠিত সংবাদ পৰিবেশন কৰি শেহতীয়াকৈ কিছু হলেও ম্লান হৈ পৰা সংবাদ মাধ্যমৰ বিশ্বাসযোগ্যতাক পুনৰ ঘুৰাই অনাৰ ক্ষেত্ৰত বিশেষ গুৰুত্ব প্ৰদান কৰিব লাগে বুলি মন্তব্য কৰি বৰকটকীয়ে সকলো সাংবাদিকক ৰাইজৰ পক্ষত থাকি বাতৰি পৰিৱেশন কৰিবলৈ আহ্বান জনায়। জিলাখনৰ উত্তৰ-পশ্চিমাঞ্চলৰ বহু কেইগৰাকী সাংবাদিক, আছু- আমছু, মুছলিম ছাত্ৰ সন্থা, নেমছুকে ধৰি বিভিন্ন ৰাজনৈতিক,অৰাজনৈতিক দল সংগঠনৰ বিষয়ববীয়াৰ লগতে শতাধিক কলেজীয়া ছাত্ৰ-ছাত্ৰীৰ উপস্থিত থাকে। জুৰীয়াৰ জ্যেষ্ঠ সাংবাদিক বালুল শইকীয়া আৰু দিবাকৰ বৰাই আঁত ধৰা সভাখনত আমছুৰ ৰাজ্যিক উপ-সভাপতি মোশ্বাৰফ হুছেইন কবিৰ, জুৰীয়া ছিনিয়ৰ চেকেণ্ডৰী স্কুলৰ অধ্যক্ষ হাৰুন ৰশিদ, জুৰীয়া খণ্ড উন্নয়ন বিষয়া মৃগাংক কুমাৰ দাস, বিশিষ্ট সমাজকৰ্মী কমৰুজ জামান সৰকাৰেকে ধৰি কেবাগৰাকী বিশিষ্ট ব্যাক্তি উপস্থিত থাকে।
