প্ৰায় ৫৯০,৮কোটি গছ পুলিৰ অস্তিত্বই নাই
■ বিৰিঞ্চি কুমাৰ ডেকা ■
২০১৯ চনৰ কথা । কেন্দ্ৰীয় বন মন্ত্ৰী প্ৰকাশ জাভাৰকাৰে দেশখনৰ সকলো ৰাজ্যৰ বনমন্ত্ৰী সকলৰ সৈতে আলোচনাত মিলিত হৈ সংশ্লিষ্ট ৰাজ্য সমূহৰ খালি হৈ থকা ভূমি সমূহত গছ ৰোপনেৰে প্ৰকাৰন্তে দেশখন সেউজ কৰি তোলাৰ লক্ষ্য আগত ৰাখি এক বৃহৎ পৰিমাণৰ ধন মুকলি কৰি দিছিল । সেই অনুসৰি একেটা বৰ্ষৰ ৩০ আগষ্টত ৰাজ্যৰ বন বিভাগলৈ কেন্দ্ৰীয় চৰকাৰৰ তৰফৰ পৰা ৫৬৫,৮ কোটি টকা মোকোলাই দিছিল । নিৰ্দেশনাটোত প্ৰতিখন ৰাজ্যৰ বন বিভাগে কেৱল গছ পুলি ৰোপন কৰাৰ বাহিৰে বিভাগীয় ভ্ৰমণ বানচ ,যান-বাহন ক্ৰয় ,অথবা দা -দৰমহাত খৰচ কৰিব নোৱাৰিব বুলিও কঢ়া নিৰ্দেশ জাৰি কৰিছিল । কিন্তু অভিযোগ মতে এনে নিৰ্দেশনাক সম্পূৰ্ণ ৰূপে উলাই কৰি বিভাগে আবন্টন দিয়া সমুদায় ধন ৰাশিৰে বিভাগীয় ফিক্সড পে কৰ্মচাৰী সকলক দা- দৰমহা দিয়াৰ উপৰিও যান-বাহন ক্ৰয় কৰাৰ নামত খৰচ কৰাৰ গুৰুত্বৰ অভিযোগ উথ্থাপিত হৈছিল । তথ্য মতে অসমৰ ৰাজ্যিক জৈব বৈচিত্ৰ পৰিষদৰ ( চমুকৈ এ পি এফ বি চি) তদানীন্তন সঞ্চালক কে এচ পি ভি পবন কুমাৰৰ কাৰ্যকালত ২০২১ চনৰ ১৬ ছেপ্তেম্বৰত যোৰহাট চাৰ্কোলত ২১ কোটি ১৯ লাখ ২৫ হাজাৰ ২৫০ টকা গছপুলি ৰোপনৰ বাবে অনুমোদন দিয়া হৈছিল । ঠিক সেইদৰে তেজপুৰত ৩৯কোটি, শিলচৰত ১১ কোটি, বঙাইগাওঁত ১৫ কোটি, হাফলংত ৩৩ কোটি,কোকৰাঝাৰত ১৫ কোটি টক আবন্টন দিয়া হৈছিল । পৰিতাপৰ বিষয় যে ৰাজকোষৰ এই কোটি কোটি টকা খৰচ কৰি বন বিভাগে ৰোপন কৰা গছপুলিৰ কোনো অস্তিত্ব বিচাৰি পাবলৈ নাই । ৰাজ্যৰ সচেতন মহলৰ মাজত মাঠোন এটাই প্ৰশ্ন যদি বন বিভাগে গছপুলি ৰোপন কৰিছিল, তেনে তাক সংৰক্ষণ কৰা কিয় নহ’ল । বন বিভাগে ৰোপণ কৰা সেই গছসমূহ সংৰক্ষণ কৰা হলেই আজি পুণৰাই ৰাজ্য খনত অমৃত বৃক্ষ আন্দোলনৰ প্ৰয়োজনেই বা ক’ত ! এইখিনিতে বিশ্ব খ্যাত প্ৰকৃতি বিদ যাদব পায়েঙৰ এষাৰ কথা প্ৰণিধানযোগ্য, তেওঁ কৈছিল যে অসমত গছপুলি ৰোপন কৰিবই নালাগে ,মাত্ৰ গছ নাকাটিলেই হ’ল । তেওঁৰ মতে জধে মধে অপ্ৰয়োজনীয় ভাবে যদি গছ কটা নহয়, তেন্তে অতি কম সময়ৰ ভিতৰতেই প্ৰাকৃতিক ভাৱে গছে সেউজীয়া কৰিব এই ধৰা। তাৎপৰ্যপূৰ্ণভাবে ৰাজ্য খনৰ মুখ্যমন্ত্ৰী গৰাকীয়ে শেহতীয়াকৈ গোলকীয় উষ্ণতা ৰোধৰ বাবে বন বিভাগৰ সহযোগত বৃক্ষ ৰোপন কৰি বিশ্ব অভিলেখ গঢ়াৰ পণ লৈ আচনি গ্ৰহণ কৰাৰ সমান্তৰালকৈ প্ৰশ্ন উথ্থাপিত হৈছে যে ইয়াৰ পূৰ্বেও চৰকাৰে বৃক্ষ ৰোপণৰ নামত কোটিৰ ঘৰত ধন ব্যয় কৰিছে যদিও কাৰ্যত সেই গছ সমুহৰ সংৰক্ষণৰ ক্ষেত্ৰত বাস্তৱিকতে উচিত পদক্ষেপ গ্ৰহণ নকৰাৰ পৰিপ্ৰেক্ষিতত এতিয়া সেই গছ সমুহৰ অস্তিত্ব নোহোৱাৰ দৰে । আন এক তথ্যমতে ৰাজ্য খনত ২০১৪ চনৰ পৰা ২০১৯ চনলৈ ৰাজ্য খনত বন বিভাগে প্ৰতিটো বন সংমণ্ডলত মোঠ ২৪২ কোটি ২১ লাখ ৯৫ হাজাৰ ৬০০টকা আবন্টন দিছিল । কথা হ’ল এই আবন্টিত ধনেৰে ৰোপন কৰা গছ পোলি সমুহ নিৰীক্ষণ নকৰাকৈ পুনৰবাৰ ৰাজখোৱাৰ পৰা কোটিৰ ঘৰত ধন আবন্টন দিয়াটোও পৰম আশ্চৰ্যৰ বিষয় হিচাপে পৰিগণিত হৈছে । ইয়াৰ অন্যতম উদাহৰণ হিচাবে শোণিতপুৰ জিলাৰ বালিপাৰা সংৰক্ষিত বনাঞ্চলৰ ভিতৰত ১৮ কোটি ব্যয় সাপেক্ষে ৰোপণ কৰা গছ সমুহৰ আজিও অস্তিত্ব বিচাৰি পাবলৈ নাই । এনে পৰিপ্ৰেক্ষিতত ৰাজ্য চৰকাৰৰ অমৃত বৃক্ষ আন্দোলনৰ ফলাফলো আগন্তুক দিনত কেনে পৰ্যায়ৰ হয়গৈ সেয়া একমাত্ৰ সময়েহে কব পাৰিব ।
