আৰক্ষী আৰু জনসাধাৰণৰ মাজত দূৰত্ব বৃদ্ধি সমাজৰ বাবে ইতিবাচক নহয়

                  ●মুৰুলী বৰুৱা

অপ্ৰিয় হলেও সত্য যে বিগত কিছু বছৰৰ পৰা অসমত একাংশ আৰক্ষীৰ কিছু অবাঞ্চিত ভূমিকা তথা কৰ্ম কাণ্ডই আৰক্ষী আৰু জনসাধাৰণৰ মাজত দূৰত্ব যঠেষ্ট খিনি বঢ়াই দিছে । আজি কেইজনমান বেপেৰুৱা মনোভাৱৰ আৰক্ষীৰ বাবেই লজ্জানত হৈছে সমগ্ৰ অসম আৰক্ষী । ঘাগ্ৰাপাৰা থানাত এগৰাকী কিশোৰীৰ বিবস্ত্ৰ অৱস্থাৰ ফটো তুলি এগৰাকী বিকৃত মানসিকতাৰ আৰক্ষী বিষয়াই অসমৰ লগতে অসম আৰক্ষীত যি কালিমা সানিলে তাক সুকীয়াকৈ বাখ্যা কৰাৰ প্ৰয়োজন নাই ।একেশাৰে কবলৈ গলে বিগত এটা দশকত অসমত একাংশ আৰক্ষীয়ে আৰক্ষীৰ খাকী পোছাকযোৰৰ মৰ্যাদা প্ৰতি মুহূৰ্ততে ভূলুণ্ঠিত কৰি আহিছে । আৰক্ষী হলেই মানুহক হোৱাই নোহোৱাই দাবী ধমকি দিয়া, কথাই প্ৰতি অশ্লীল শব্দ প্ৰয়োগ কৰা ,অপৰাধীৰ লগত মুকলি ভাৱে মিতিৰালী কৰি অপৰাধীৰ পক্ষ লোৱা, অভিযোগ দিবলৈ যোৱা ব্যক্তি জনকো বিভিন্ন অবান্তৰ প্ৰশ্নৰে হাৰাশাস্তি কৰা , অবৈধ ভাৱে ধনৰ লেনদেন কৰা কৰ্ম কাণ্ড বোৰ একাংশ আৰক্ষীৰ ক্ষেত্ৰত প্ৰায়ে দৃষ্টিগোচৰ হয় ।এই সকল আৰক্ষী লোকৰ বাবেই বহু সময়ত সৎ আৰু নিজৰ দায়িত্বৰ প্ৰতি নিষ্ঠাবান বহু আৰক্ষীও সমাজৰ দৃষ্টিত অবিশ্বাসৰ পাত্ৰ হৈ পৰে । এজন আৰক্ষীয়ে যেতিয়া নিজৰ ব্যক্তিত্ব হেৰুৱাই পেলাই, আৰক্ষীয়ে যেতিয়া পাশৱিক আচৰণ কৰিবলৈ লয় ,যেতিয়া এজন আৰক্ষীয়ে অপৰাধীৰ পক্ষ লব তেতিয়াই ক্ৰমান্বয়ে উশৃংখল হবলৈ আৰম্ভ কৰে সমাজখন । তেতিয়াই সাধাৰণ জনতাৰ আস্থা হেৰাই যাবলৈ ধৰে আৰক্ষীৰ ওপৰত । লাহে লাহে আৰক্ষী আৰু জনসাধাৰণৰ মাজত দূৰত্ব বৃদ্ধি পাবলৈ ধৰে । যাৰ পৰিণতিত বহু সময়ত সাধাৰণ জনতা আৰু আৰক্ষীৰ মাজত আৰম্ভ হয় খণ্ড যুদ্ধৰ । থানা আক্ৰমণ কৰাৰ সাহস লাভ কৰে একাংশই । থানা ঘেৰাও কৰিবলৈ উদ্যত হয় । আৰক্ষীৰ প্ৰতি থাকিব লগা শ্ৰদ্ধা যেতিয়া ভয়লৈ ৰূপান্তৰিত হয় তেতিয়াই এটা অঞ্চল নিয়ন্ত্ৰণত ৰখাত ব্যৰ্থ হয় আৰক্ষী । অপৰাধীয়ে ভয় কৰক , সৰ্বসাধাৰণ জনতাই শ্ৰদ্ধা কৰক ,এই নীতি সৰোগত কৰি আৰক্ষীয়ে দায়িত্ব সম্পাদন কৰিব পাৰিলেই অপৰাধ নিয়ন্ত্ৰিত হব । আন এটা অতি গুৰুত্বপূৰ্ণ কথা যে অসম আৰক্ষীৰ বিশেষকৈ পৰিদৰ্শক বা উপ -পৰিদৰ্শক পৰ্যায়ৰ বহু আৰক্ষী বিষয়াৰ প্ৰচলিত ন্যায়িক ব্যৱস্থাটোৰ সম্পৰ্কে জ্ঞান তেনেই সীমিত । নতুনকৈ নিযুক্তি প্ৰাপ্ত এজন আৰক্ষী বিষয়াক তেওঁলোকৰ অনুশীলন পৰ্যায়ত ন্যায়িক ব্যৱস্থাটোৰ সম্পৰ্কে যিখিনি প্ৰাথমিক জ্ঞান দিয়া হয় সেয়া পৰ্যাপ্ত নহয় । তেনে একাংশ আৰক্ষী বিষয়াক যেতিয়া এটা কেচৰ দায়িত্ব অৰ্পণ কৰা হয় তেতিয়া তাত ভুল হোৱাটো তেনেকৈ স্বাভাৱিক কথা । ইয়াৰ উপৰিও পূৰ্বে কোনো এটা অপৰাধৰ গোচৰত অভিযুক্ত হৈ নিলম্বিত হোৱা আৰক্ষী বিষয়া জনক পাছত এখন গুৰুত্বপূৰ্ণ থানাৰ দায়িত্ব দিয়াৰ ক্ষেত্ৰত সদায় সাৱধান হব লাগে অসম আৰক্ষী শীৰ্ষ বিষয়া সকল । শেহতীয়াকৈ অতি নিৰ্লজ্জ কাণ্ড সংঘটিত কৰি চাকৰি হেৰুৱা বিমান ৰয় নামৰ বৰ্তমান পলাতক আৰক্ষীৰ বিষয়াজনো পূৰ্বে নিলম্বিত হোৱা বিষয়া । এনে বিষয়া সকলৰ ক্ষেত্ৰত অসম আৰক্ষী যদি কঠোৰ নহয় তেতিয়া আৰক্ষীৰ দ্বাৰা অপৰাধ সংঘটিত হৈয়ে থাকিব । বহু সময়ত দেখা যায় একাংশ আৰক্ষী বিষয়াই এটা কেচৰ অভিযোগ নামা প্ৰস্তুত কৰোতে যঠেষ্ট পলম হয় । এখন অভিযোগনামা প্ৰস্তুত কৰাৰ ক্ষেত্ৰত চিকিৎসা বিভাগৰ উপৰিও অন্যান্য বিভাগৰো সহযোগিতা প্ৰয়োজন হব পাৰে । এই ক্ষেত্ৰত সেই বিভাগ সমূহৰ লগত থাকিব লগা সমন্বয়হীনতা তথা সহযোগিতাৰ অভাৱৰ বাবে এখন অভিযোগনামা প্ৰস্তুত কৰাত পলম হোৱাৰ লগতে নিদিষ্ট গোচৰত যি ধাৰা লগাব লাগে সেই সম্পৰ্কে জ্ঞানৰ অভাৱৰ বাবেও বহু অপৰাধী সাৰি যাবলৈ সক্ষম হয় । মুঠতে চৰকাৰ আৰু আৰক্ষীৰ শীৰ্ষ মহলে সমগ্ৰ অসমৰ থানা পৰ্যায়ৰ আৰক্ষী বিষয়া কৰ্মচাৰী সকলৰ সংস্কাৰৰ ক্ষেত্ৰত যঠেষ্ট কৰণীয় এতিয়াও আছে । প্ৰথমে পূৰ্বে বিভিন্ন অভিযোগত অভিযুক্ত আৰক্ষী বিষয়া সকলৰ ওপৰত এতিয়াৰে পৰা কঠোৰ দৃষ্টি ৰাখক আৰক্ষী শীৰ্ষ মহলে । ইয়াৰ লগতে অসমৰ প্ৰতিখন থানাৰ বিষয়া কৰ্মচাৰী সকলক চাপমুক্ত কৰি ৰখাৰ ক্ষেত্ৰতো গুৰুত্ব দিব লাগিব অসম আৰক্ষীৰ শীৰ্ষ মহলে । সমাজত কম বেছি পৰিমাণে অপৰাধী বা অপৰাধ জনিত কাম কাজ সকলোতেই থাকিব । এশ শতাংশ অপৰাধ নিৰ্মূল কৰাটো সম্ভৱ নহয় যদিও এখন অপৰাধ মুক্ত সমাজ গঢ়াৰ ক্ষেত্ৰত জনসাধাৰণৰ লগতে আৰক্ষীৰো এক গুৰুত্বপূৰ্ণ ভূমিকা থাকে । এই ক্ষেত্ৰত আৰক্ষী আৰু সাধাৰণ জনতাৰ মাজত এক বন্ধুত্বপূৰ্ণ সম্পৰ্ক যদি গঢ়ি ওঠে তেতিয়াই অপৰাধীৰ সংখ্যা কমি যায় । ভয়মুক্ত ভাৱে যিদিনাই সাধাৰণ জনতাই অপৰাধ বা অপৰাধীৰ সম্ভেদ আৰক্ষীক দিব পৰা পৰিবেশ এটা সৃষ্টি হব তেতিয়াই সমাজত অপৰাধীৰ সংখ্যা হ্ৰাস পাব । কিন্তু তাৰ যদি বিপৰীতে গৈ একাংশ আৰক্ষীয়ে অপৰাধীৰে সম্পৰ্ক গঢ়ি তোলে তেতিয়াই সমাজখন বিপথে পৰিচালিত হবলৈ ধৰে । অসমৰ জনসাধাৰণে মন প্ৰাণে বিচাৰিছে অসম এখন অপৰাধমুক্ত ৰাজ্য হিচাপে চিহ্নিত হওক । জনসাধাৰণৰ আন্তৰিক সহযোগিতা আৰু অসম আৰক্ষীৰ সততা কৰ্মনিপুণতাই তাক নিশ্চয় সম্ভৱ কৰি তুলিব পাৰিব লাগিছিল । কিন্তু দুৰ্ভাগ্যজনক কথা যে সেয়া এতিয়াও হৈ উঠা নাই । আমি বিচাৰো অপৰাধীৰ বিৰুদ্ধে আৰক্ষী কঠোৰ হওক, কিন্তু তাৰ সামন্তৰাল ভাৱে আৰক্ষী নম্ৰ হওক, ভদ্ৰ হওক আৰু সৰ্বসাধাৰণ ৰাইজৰ এজন বিশ্বাসী বন্ধু হিচাপে আত্মপ্ৰকাশ কৰক । আশা ৰাখিছো অনাগত সময়ত অসম আৰক্ষীয়ে সচা অৰ্থত জনসাধাৰণৰ কাষত থাকি জনসাধাৰণৰ হৈ কাম কৰাৰ এক পৰিবেশ সৃষ্টি কৰাত সফল হওক ।