ডিজিটেল সেৱা, নগাঁও: নগাঁও জিলা জাতীয় বিদ্যালয় সমন্বয়ৰক্ষী সমিতিৰ সৌজন্যত আজি নগাঁও জিলা পুথিভঁৰাল প্ৰেক্ষাগৃহত এক গাম্ভীৰ্যপূৰ্ণ সম্বৰ্ধনা সভা অনুষ্ঠিত হৈ যায়। জিলা সমিতিৰ সভাপতি সুনীল কুমাৰ বৰাৰ সভাপতিত্বত অনুষ্ঠিত এই সভাত অসম জাতীয় বিদ্যালয় শিক্ষা সংসদৰ সভাপতি দিলীপ দত্ত চৌধুৰী, সমন্বয়ক অসীম কৃষ্ণ বৰুৱা আৰু জয়ন্ত হাজৰিকা বিশিষ্ট অতিথি হিচাপে উপস্থিত থাকে। সভাত ভাষণ প্ৰদান কৰি শিক্ষা সংসদৰ সমন্বয়ক অসীম কৃষ্ণ বৰুৱাই কয় যে, ৰাজ্যিক বৃত্তিয়ে বিদ্যালয়সমূহত এক নিৰবিচ্ছিন্ন অধ্যয়নৰ পৰিৱেশ গঢ়ি তুলিছে। আনহাতে, জিলা সমিতিৰ পৰীক্ষা নিয়ন্ত্ৰক দিলীপ বৰাই মন্তব্য কৰে যে, অসম ভিত্তিত আয়োজিত জাতীয় বিদ্যালয় ৰাজ্যিক বৃত্তি পৰীক্ষাই উঠি অহা নৱ-প্ৰজন্মক ভৱিষ্যতৰ প্ৰতিযোগিতামূলক পৰীক্ষাসমূহৰ বাবে এক শক্তিশালী বুনিয়াদ গঢ়ি তুলিব। ইউনিটেৰিয়ান জাতীয় বিদ্যালয়ে জিলাখনৰ ভিতৰতে সৰ্বাধিক ছাত্ৰ-ছাত্ৰীয়ে বৃত্তি লাভ কৰি শীৰ্ষ স্থান দখল কৰিবলৈ সক্ষম হৈছে। এই বিশেষ সভাতে ২০২৬ বৰ্ষৰ হাইস্কুল শিক্ষান্ত (HSLC) আৰু উচ্চতৰ মাধ্যমিক (HS) চূড়ান্ত পৰীক্ষাত ষ্টাৰ আৰু ডিষ্টিংচন নম্বৰসহ কৃতিত্বৰে উত্তীৰ্ণ হোৱা জিলাখনৰ ১২৩ গৰাকী মেধাৱী ছাত্ৰ-ছাত্ৰীক ভৱিষ্যতৰ পথত আগবাঢ়ি যাবলৈ বিশেষভাৱে উৎসাহিত আৰু সম্বৰ্ধিত কৰা হয়।